الماستــر وسنينــه

بمـا إني الحمد لله فاضلي شهر ونص وأتخرج من AUC
بعد عناء ومشقة وجهدٍ مضنٍ وسهر ليالٍ على مدار 3 سنين :D
ما بين المنصورة الفاكسة والقاهرة الساحرة والأبحاث والقواميس والحــر والبرد والأمطــار :D
قررنـا نحن الآن الخوض إلى المرحلة القادمة ألا وهي

الماجستيـــــــــــــــــر
أو MS Degree
(شوية فزلكة كدة على الماشي :D)

وما أدراك ما الماجستير في بلادنـــا :D
تخليك تكره اليوم اللي انت جيت فيه أساسـًا

وبما إني بقى عارفة مسبقًا بإنه جامعتنا المبجلة جامعة المنصورة ليس بها تخصصي
ألا وهو الترجمــــة
(ولا شيء غير الترجمـــة :D)

لذا وجبت رحلة البحث في جامعات المحروســة – الحكوميـة منهـا والخاصــة – عن هذا التخصص المفقــود
(مظلومين والله العظيم بتوع الترجمة دول اهئ اهئ)

وما بين المواقع الإلكترونية والاستعلام عبر الهاتف والذي منــه إليكم النتائج المبهــرة الآتية

آداب القاهرة
مفيش ماستر في الترجمة .. في دبلومة فقط واحدة تخصصية والتانية مهنية

طب آداب عين شمس .. برضه مافيش
طب ألسن عين شمس .. ما قلنا مافيش يا عم
طب بنــات عين شمس .. انت ما بتفهمش؟ قلنـا مافيش
طب آداب حلوان .. برضه مفيش
طب ألسن والا آداب المنيــا .. والله العظيم مافيش ماستـر ترجمــة

طب حتى طنطــا والا الزقازيق والا المنوفيــة
مافيش دراســـات لغوية أصـــلاً

أدب فقط

طب نسأل في الأزهـــر في كلية اللغات والترجمة هناك
قالوا لنـا لازم تاخدي الأول سنة تمهيدية عشان المواد الفقهيــة اللي انتي مادرستيهاش
يا حلاوة يا ولاد
أعيد التمهيدي تاني؟؟
ده أنا ما صدقت خلصت منه
فكك يا عــم

طب ندور على الجامعات الخاصـة
مصـــر الدوليـــة
6 أكتوبر
مصر للعلوم والتكنولوجيـا
آسفين ماعندناش ماستــر أصـــلاً
ماعندكوش ماستــر أصــلاً؟؟
أمال معمولين ليه بسلامتكم؟


قوم إيـــه
يخطر على بالي فجـأة جامعــة الإسكندريــة :D
وإذا بي أدخل على الموقع الخاص بالجامعــة
وأتصفح موقع كلية الآداب قسم اللغة الإنجليزية هنــاك
واختار برامج الدراسات العليا
فإذا بي أرى ما لم تصدقه عيني
أرى تخصصـًا للماجستير في اللسانيات والترجمــة
يا ما انت كريم يارب
كنتي فين من زمان يا شيخة :D
إنهــا إسكندرية حبيبة قلبي
وهيييييه بقى وهاعيش في إسكندرية وأتمتع بجمالها اللي ما يتحكاش عليه و و و و
وأغيظ كباري وماجــا اللي على طول بيغيظونا بصورهم عنهـا :D

ولكن يا فرحـــة ما تمت
أهلي موافقوش أولاً
ثانيـًا: للأسف البرنامج بتاعهم دراسات لغوية أكتر منه ترجمة
مادة واحدة فقط هي ترجمة تخصصية + مادة اختيارية أدبية من بين 3 مواد
شعــر .. أو رواية .. أو نقــد

(ده ايه النحس ده)

قوم إيـــه بقى ندخل على الجامعات الأجنبيــة
AUC .. مافيش ترجمة خالص

الجامعــة الألمانيــة .. البريطانيــة .. الكنديــة
مافيش كلية لغــات وترجمــة أصلاً
يادي الخيبة القويــة
طب أروح فين يا جدعان بالتخصص بتاعي ده؟؟
هو تخصص نادر أووي كــدة :D

لحد ما استقريت أخيـرًا على الجامعــة الفرنسيــة
كلية اللغــات التطبيقيــة .. قسم الترجمــة التخصصيــة :D

اتصلنــا وسألنــا وتأكدنـا من الخبــر
(يحسن أكون بحلم والا بيتهيألي والا حاجة :D )
وعرفنـا التفاصيل وسألنــا على ميعــاد التقديــم
قالولنـا إن شـاء الله السنة الجايــة 2010 – 2011
لأنهم لسة بيتشاوروا على بروجرام الماستر في الجامعة هيبقى عامل إزاي؟؟


أنــا
&%&#@@$*؟%&**#$@&&$#@

ولا حول ولا قوة إلا بالله
اهئ اهئ اهئ
عااااااااااااااااااااااااااااااااااااااا