- هو في حد مش عارف هو عايز ايه؟
- في ناس بتعيش حياتها كلها مش عارفة هي عايزة إيه
- الكلام ده عمره 2000 سنة
- الكلام ده عمره ما كان صح زي دلوقتي .. بص لأبطال الروايات اللي هزت العصر الحديث .. من أول "إبسن" لحد رواياتك .. مشكلتهم حاجة واحدة .. مش عارفين هما عايزين ايه
المشهد ده كان بين نجاة وصالح سليم في فيلم "الشموع السوداء
أقوى فيلم رومانسي في تاريخ السينما المصرية في رأيي :D
كتير جدًا بســأل نفسي السؤال ده
احنا عايزين ايه بالضبط؟
بنحلم بايه؟
بلاحظ دايمًا إنه احنا كمجتمعات عربية تايهين
خايفين .. خايفين من فكرة التجربة
خايفين من الفشـــل
مش عارفين نختار صح
محتارين .. مش عارفين نتماشى مع الحاضر
عايشين على الماضي وتراثه
شايفين إنه الماضي هو الأسلم وهو الأصح
خايفين من المستقبل دايمـًا و مابنحاولش نفكر فيه صح
متكتفين .. بعادات وتقاليد وأفكار وقوالب
stereotypes
ابن الدكتور لازم يبقى دكتور
وابن المهندس لازم يبقى مهندس
والمحترمين منحصرين في 3 فئات
الدكتور .. والمهندس .. والصيدلي :D
فيها ايه لو كل واحد اختار طريقه بنفسه وعاش حياته بالطريقة اللي تعجبه؟
ليه دايمًا بنحبس نفسنا في قوالب ومتحكمين بعادات وتقاليد أكل عليها الزمان وشرب؟
زي ما الحاجة أم الاختراع
فالحرية كمان أم الإبــداع
ليه ماحدش بيسيب حد في حاله؟
ليه ماحدش قادر يقتنع إنه كل واحد حر في اختياراته وفقًا لميوله ونظرته وهواه؟
ليه دايمًـا مش عارفين احنا عايزين ايه وبنسعى له؟
ولما نُصادف بصاحب فكر مختلف وعارف هو عايز ايه بيُحارب بشتى الطرق؟
وبيتم التعامل معــاه على إنه كائن من المريخ؟
انت بقى
عمرك سألت نفسك قبل كدة انت عايز ايه؟
يالا أسيبكم مع فنجان الشاي أو القهوة المظبوط
كل واحد يقعد مع نفسه كدة في ساعة صفا ويقولنا هو عايز ايه :D
وعمل ايه أو بيعمل ايه عشـــان يوصل للي هو عايزه؟ :D
عايزين نولعهــا :D
وعمل ايه أو بيعمل ايه عشـــان يوصل للي هو عايزه؟ :D
عايزين نولعهــا :D
10 التعليقات:
حلوه نقطة المحترمين الثلاثه دى :))
وجميل تعبير الحرية أم الإبداع الحقيقه
وبالنسبه لأسئلتك فالحقيقه ان كنت لسه بتكلم فى الموضوع ده من قريب
لكن أظن الحمد لله انى عارف انا عاوز ايه
وعارف اوصل لده ازاى
او يمكن متهيقلى عارف أوصله ازاى
لكن بغض النظر عن كل الكلام ده ، فكل ده محتاج لتوفيق وتسديد للخطى من ربنا عزوجل
الأهم أن نسعى ونحاول ، فقد يكون السعى والمحاولة والطريق الى الهدف شرف وفخر أفضل وأسمى من الهدف والغاية فى حد ذاتها ،،
بس ياريت انتى برده تجاوبى على أسئلتك قبل ما نجاوب احنا :))
ونسأل الله لنا ولكى التوفيق يا اختى
السلام عليكم
طب ينفع اشرب حاجه غير القهوة والشاي لإني من كارهي المشروبين دول :D
بصي في ناس بتبقى مش عارفه هى عايزه ايه لإنها عاجزة عن تحقيق امانيهم واهدافهم نظرآ للظروف المحيطة بيهم واللي دايما بتكون عائق قصادهم فبيستسلموا لليأس ويفضلوا محلك سر
على نقيض ان فيه ناس تانيه مش عارفه هي عايزه ايه ولاعايزه تعرف مستنين الفرج من عند ربنا مابيسعوش للي هما عايزينه ولا راسمين في حياتهم خط واحد صح
وبالنسبالي الحمدلله انا عارفه انا عايزه إيه رغم انه قابلتني حاجات كتير كسرتني زي اللي ذكرتيها في بوستك اننا متكتفين بأفكار حابسه جوانا حريتنا
بس برجع واقول لنفسي مفيش حاجه بالساهل لازم اسعي للي انا عايزاه عشان انوله
والله يا يسرا ان كل اللي عايزاه هو هدف نفسي ربنا يمنحه لي في الدنيا ويوفقني في طريقي له :)
موضوعك حلو يا يسرا والموسيقى تحفففففففففه بجد :)
يويو ياحلوة اه يازينة
لولا غلاوتك لوما جينا
كل الحبايب بيقولوا
بيقولوا بنحبك يا يويو
تارارارارارا
ينفع كده اقعد اغنيلك في كل حتة :D
نرجع بقى للموضوع
اولا انا عايزة واحد نيسكافيــه :D
ثانيا تصدقي لو قلتلك إن كل حاجه كنت عايزاها او حلمت بيها او خططت ليها ماحققت منها ولا حاجه ..سبحان الله كإنها ماكانتش مكتوبالي او ماليش فيها نصيب..فكل اللي حققته لحد دلوقتي ماكانش مخطط ليه وكان من ترتيب الظروف يعني مشيئة الله اني امشي في الطريق ده واعمل ده واروح لده ومع ذلك مبسوطة بيه اوووي ورضى من رب العالمين :)
انا من اللى عارفين هم عايزين ايه..عايزة ابقى مبسوطة..او بلاش مبسوطة دى عشان يمكن صعبة شويتين..خليها مرتاحة
شوفتى طلباتى فى الحياة بسيطة ازاى:D
ما هو أكيد هاقول أنا عايزة ايه يا مصعب :D ولو إنكم أكيد زهقتم مني من كتر ما اتكلمت فيه على إيجي :D
وأكيد كلنا ماشيين بتوفيق ربنا سبحانه وتعالى .. بس لازم علينا نسعى برضه الأول ونحاول زي ما انت قلت :)
نورتني يا مصعب :)
مروتي
طبعًا يا حبيبتي البوفيه مفتوح قدامك :D .. مانجا ينسون كركديه اللي تحبيه :D
كلامك صحيح جدًا بالنسبة للي قاعدين محلك سر ومش بيحاولوا حتى يغيروا من ظروفهم وأوضاعهم .. أنا معاكي إنها حاجة صعبة جدًا .. بس ليه مانحاولش؟ .. أهما دول اللي بيحكمهم الخوف أو هما تربوا على كدة وشايفين إنه ده الصح قلازم يبقوا كدة :)
والناس التانية اللي مستنيين الفرج أنا منكرش إنه ساعات بأبقى منهم .. بس برضه بحاول مش بسكت والله الموفق بقى :) .. لو جت أهلاً وسهلاً ولو مجتش يبقى ندور على غيرها .. بس لازم ساعتها نكون محددين هدف واضح نمشي عليه :)
ميرسي يا حبيبتي نورتيني بجد .. والموسيقى اتفضليها والله ما تغلاش عليكي :D هي أصلها هدية من صديق عزيز جدًا عليـا فحبيت أحطها يعني :D
سرورتي
ايه ده كله بس :D
ميرسي يا قمر، الله أعلم بجد أنا برضه بحبك قد ايه :))
وعندك واحد نسكافيه وصلحه :D
جميل جدًا إحساس الفناعة والرضـا اللي انتي بتحسيهم بجد رغم إنه زي ما بتقولي ما حققتيش أي حاجة من اللي انتي بتحبيها :)
يارب اوعدنا ياااااارب :D
طنط حرة :D
(معلش اقتبستها منك دي يا قباري :D)
يا سلاااااااااااام
ده انتي جبتي مربط الفرس :D
فعلاً مين يلاقي النهاردة راحة البال بجد :$
حلم بسيط جدًا لكنه صعب الحصول عليه جدًااااااا بصراحة :))
نورتي يا جميل
زى ما قالت بنت مصريه
انا نفسى فعلا اكون مرتاحه وراضيه
يعنى لا بدور على مناصب ولا فلوس
بس للاسف حتى الاحلام البسيطه بقت حاجه بعيده قوىى
فيه ناس كتير عارفه هى عايزه ايه بس للاسف مش لاقيه حد يوجها او تبتدى منين
الخطوه الاولى اصعب حاجه وبعد كده بتكون كل حاجه سهله
احنا لاسف متكتفين بعادات وتقاليد بقت حمضانه ومتجيبش همهما
وعندنا تسميات وتصنيفات احنا الى عملناها ومش عارفه على اساس ايه
علشان كده تلاقى دايما الى مش عارف يحقق احلامه والناس بتحبطه بيبص للماضى لان الماضى كان مرادف للحريه بدرجه معينه سواء للطفوله او المراهقه
غلطان جدا الى بيقول كل ما يكبر الانسان تزيد حريته بالعكس
لانه كل ما بيكبر بتزيد قيوده
توأمتي
صدقتي فعلاً إنه في ناس كتير جدًا عارفة هي عايزة ايه بس عايزة اللي يشجعها ويحفزها على ده ويحطها على أول الطريق .. بعد كدة هو يمشي فيه بقى ويحقق اللي هو عايزه :)
بس تفتكري مين بيعمل كدة في زمننا ده إلا القليل القليل؟ .. ده احنا بنفسن على بعض يا بنتي :D
وفعلاً كل ما الإنسان بيكبر قيوده بتزيد بل يمكن تخنقه .. بس برضه هارجع وأقول ليه ما نحاولش نغيّر ونختلف؟
أعتقد إنه المتحكم الرئيسي في ده كله هي الإرادة القوية وعدم الاستسلام :))
ربنا يوعدنا إن شـاء الله :D :D
Post a Comment