يومك خلص راجع تعبان منهك
مزاجك اتعكر من الزحمة والخنقة والروتين وكلام الناس في المواصلات اللي مالوش لازمة
يا إما عن الأهلي
يا إما عن الغلاء الشديد
يا إما عن الثانوية العامة
يا إما عن الحزب والحكومة والتوريث
يا إما عن الحزب والحكومة والتوريث
كلام في كلام ودماغك تتصدع أكتر
تروح تقعد في الناحية اللي فيها الستات .. تتصدع أكتر
كلام عن فلانة اللي ماخلفتش لغاية دلوقتي
كلام عن علانة اللي اتطلقت ورافعة قضية نفقة
كلام عن بنت فلانة اللي يا عيني كملت 28 سنة وبايرة
كلام عن اللي مايتسماش اللي بيرجع كل يوم وش الفجر
تتخنق أكتر تقوم من مكانك وتقف تلاقي شباب واقفين عمالين يبصوا على بنات ومشغلين بلوتوث ورنات
تلاقي واحد بيداري لفة بانجو في الشراب بتاعه أول ما لمح لجنة طلعت من تحت الأرض
تلاقي واحد ماشي رث الثياب أشعث الشعر عمال يقول دنيا فانية وزمن كباس كله رايح كله ماشي
تلاقي السواق مشغلك القران فتبتدي أعصابك تستريح
بس واحد غتت يقولك وطي شويـة يا أسطى وإلا مشغل أغاني الموبايل بصوت عالي
طيب يا بني ادم السماعات دي عملوها ليه؟
مش علشان ترحم الناس من الوش ده؟
مش علشان ترحم الناس من الوش ده؟
تلاقي واحد جنبك بيقولك أنا بيتهيألي شفت حضرتك قبل كدة؟
انت بتسهر في الحسين؟
الحسين؟
الحسين آخر مره رحته من 5 سنين انت شارب حاجه يا ابني؟
توصل البيت تلاقي أكلك جاهز
تخلصه تدخل تاخد شاور وتصلي العصر تتمدد على السرير
تخلصه تدخل تاخد شاور وتصلي العصر تتمدد على السرير
فجأة تحس إنك بتتخنق وإنك بتغوص في السرير والدنيا بتظلم
بتحس إنك
بتغرق
وتغرق
وتغرق
تسمع صوتك جاي من بعيد
حانت ساعتك فهل استعددت؟
تصرخ بصوت مكتـــوم
لا لســــة
لسـة فاضل لي حاجات كتيرة
لسـة ماتوبتش عن ذنوبي
لسـة ماكملتش الفروض اللي عليا
لسـة ماكملتش الفروض اللي عليا
لسـة مازرتش بيتك يا رب
لسـة ماحفظتش القرآن
لسـة ماقضيتش الزكاة
لسـة ماكفرتش عن أخطائي
لسـة ماسددتش ديوني
لسـة مارضيتش ضميري كمسلم وإنسان وأديت واجبي نحو قومي
لسـة فاضل لي حاجات كتيرة
إديني فرصة تانية إديني آخر مرة وأنا هاكون عند حسن ظنك بيا
تفتح عينك تلاقي نفسك لسـة واقف مستني الأتوبيس
وتلاقي الناس وراك
وتحس إن ده كله إشارة ورسالة بمهمة لازم تأديها
يا ترى هتأديها؟
6 التعليقات:
نسأل الله أن يرزقنا تأديتها ،، آميــن يارب العالمين
الحقيقه فى حديث بنفس المعنى ده انا سمعته زمان اوى بس مش حافظه ولا عرفت أجيبه
والحديث جميل اوى بيتكلم تقريبا عن نفس كلامك فياريت لو تقديى تجيبيه يا أختى يبقى جزاكم الله خيرا :))
بس تعرفى مش عارف لسه حاسس ان مش ده أسلوبك فى الكتايه :)
السلام عليكم
أمال مين يعني يا مصعب :D
ربنا يعيننـا إن شاء الله
الواحد كل يوم بيتمنى انه يرتاح من الدنيا
بس بيفكر هل هو مستعد لقاء ربنا
انا رأيي من راى ايمان..و لو تفتكرى انا قلتلكم حاجة شبهه امبارح :)
بس مش عارفة ليه كل ما بقوله لحد اليومين دول بيقول عليا كئيبة :D
اللهم احسن خاتمتنا جميعا يا رب
إيمـان
فكرة عذاب القبر نفسها بتخوفني ويقشعر لها جسدي .. ساعات أقول مش فارقة وزي ما تيجي تيجي حياة أو موت أهو كله عند ربنا في الآخر .. وساعات تانية بأبقى مرعوبة رعب فظيع وأدعي ربنا بالرحمة والمغفرة بجد :)
فلة
آآه يختي انتي وفاطمة أبدعتوا امبارح :D
بس كان يوم لذيذ والله مش كدة ;)
ميرسي يا بنات على مروركم بجد وربنا يهدينا ويحسن خاتمتنا جميعـًا يارب :)
لا يا يسرا
مش هى هى
الى بيروح هناك مينفعش لا ندم ولا واسطه ولا دموع
هناك يا تكون بدايه
يا تكون نهايه
ربنا يجعلها لنا بدايه
Post a Comment