الشغــــــل وسنينــــه

All work all the time

الحمد لله أتممت الدبلومة على خير شهر يوليو اللي فات
وبما إني بحب الحركة جدًا لدرجة وصفي بالــ workaholic من البعض
وبمـا إن الماستر اتأجل سنــة قــدام
إذن عليك بالخطة البديلة مؤقتــًا ألا وهو الشغـــل :D
وآآه من الشغــــل وسنينــه
معاناة ما بعدها معاناة

بدأت الرحلة في أوائل 2009
ما هو أنا لازم كدة دايمًا أخطط قبلها بفترة كافية عشان أنجز :D
كنت بأدرس ساعتها في شهادة ترجمة الشاشة
Screen Translation
وبما إنها توافقت مع ميولي الفنية ولقيتني منجذبة لها
ومستمتعة بيها جدًا فقلت أحاول أشتغل فيها

قدمت الأول في شركة Masreya Media
باقتراح من ميس ريهــام (مدرستي اللي كانت بتديني وقتها)
مع صحبتي اللي بتشتغل هناك بالفعل .. وفعلاً راسلتهم على الميل وبعت لهم C.V.
على أساس يشغلوني كــFreelancing Translator
والحمد لله ردوا عليا تاني يوم على طول وبعتولي Test
مع فيديو لبعض المقاطع للترجمة .. وحليته فعلاً وبعت لهم الرد على الميل تاني .. أستنى يردوا عليا مافيش رد .. بأتصل بصحبتي بتقولي ما هما أكيد مش هيردوا قبل شهرين تلاتة .. بس انتي خليكي متابعاهم على طول .. قلت لها أوكي وسبت الأمور تاخد مجراها.

في السيمستر الصيفي .. كانت آخر مادة ليا في الشهادة دي .. كنا اتفقنا أنا والجروب اللي كان معايا وقتها مع دكتورة المادة نشترك في مشروع خاص لينا ونعرضه على أحد المنتديات مع جزء خاص بالترجمة المتنوعة (مقالات، أفلام، برامج، إلخ) .. كان معانا زميل متخصص في عالم المنتديات وهو اللي تولى الموضوع ده طبعًا بالتفاوض مع الشركة اللي بيشتغل معاها .. وفعلاً تم أخذ بياناتنا وأرقام تليفوناتنا وعلى ما خلصنا السيمستر كانت الفرصة جاهزة فعلاً .. لكن تشاء الأقدار إنه أنا أنسى الموضوع نهائيًـا وأدخل على المنتدى المذكور أفاجأ بإنهم خلاص أعلنوا عن اختبار للمتقدمين على صفحة المنتدى ويتم التسليم في أقصى ميعاد ليهم تاني يوم .. وأجي أبص على التاريخ ألاقيني فات يجي 20 يوم تقريبًا على الميعاد .. طبعًا الفرصة راحت عليـا .. ولا حد اتصل بيا ولا خبرني بالموضوع من أساسه .. الكلام ده كان أواخر أغسطس كدة .. طبعًا قلت خلاص بقى ما بدهاش وخير إن شاء الله .. خيرهـا في غيرهـا.

بعت لشركة تالتة بتشتغل برضه في ترجمة الأفلام اسمها "تنويـــر" في مدينة نصر .. واستنيت برضه الرد عليا منها أو من شركة Masreya Media .. الحمد لله "تنويــر" ردوا عليـا وحددوا معايا اختبار يوم السبت 10/10 .. ورحت لهم فعلاً بعد ما دوخنا على العنوان طبعًا .. وامتحنت .. بس الحقيقة كان يوم عصيب الامتحان كان طويل وصعب .. خصوصًا إنه كان في جزء فوري .. يعني أسمع الكلام وأترجم .. وأنا أصلاً شهادتي كلها Written Translation
يعني مش ملزمة بالفوري .. دي شهادة لوحدها أصلاً بعيدًا عن تخصصاتي .. طبعًا لبخت الدنيــا خصوصًا إنه كان برنامج Talk Show
والنتيجة إني ماعرفتش أكمل .. حتى حاولت أفرغ الحوار على الورق وأرجع أترجمه بعد كدة ما عرفتش أبدًا .. قلت خلاص بقى الحمد لله على كدة الوقت كان انتهى أصلاً ومافيش فايدة .. بتعملي ايه! .. طبعًا مشيت وأنا عارفة بالنتيجة مسبقًا.

رجعت تاني اتصلت بــ Masreya Media بس المرة دي بالتليفون .. وأفاجأ إنهم لسة ما أعلنوش عن نتيجتي لأنهم بياخدوا نسبة من المتقدمين كل شهر ما بيزيدوش عنها .. فقالولي ممكن إن شاء الله على الشهر الجاي أو اللي بعده .. قلت أوكي .. فات شهر واتنين وتلاتة وأربعة .. وبرضه مافيش رد .. بقول لصحبتي الكلام ده .. قالت لي مش معقول إنهم ماردوش لحد دلوقتي .. خلاص انتي بقى روحيلهم وقابلي أستاذ فلان وقوليله إنك من طرفي وهو هيساعدك إن شاء الله .. وبالفعل رحت لهم وفوجئت بيهم بيقولولي إني ما نجحتش في الامتحان أصلاً عشان كدة هما ما اتصلوش .. طبعًا أنا أخدت الصدمة وشكرتهم ومشيت :D

بعدها بشهر تقريبًا لقيت صديقة ليا من AUC
بعتالي إيميل بتقولي فيه على مشروع ترجمة عاملاه شركة Google
بالاشتراك مع جامعة القاهرة ودار الترجمة التابعة لجمعية صناع الحياة (اللي صحبتي بتشتغل فيها أصلاً) اسمه "مشروع ترجمة الويكيبيديا العربية" .. وقالت لي على التفاصيل كلها وإنهم عايزين مترجمين وكدة .. أنا الحقيقة فرحت جدًا ولقيتها بعتت لي إيميل المشرفة على المشروع (اللي هي أصلاً مديرة صحبتي في دار الترجمة) .. وبعت لها C.V. بتاعي وقالت لي إنها سجلت اسمي بالفعل عندها في ليستة المتقدمين لحين ما يطلبوا تراجم لأي موضوعات على الويكيبيديا .. وأديني قيد الانتظــار : )

صديقة تالتة من AUC برضه قالت لي على مكتبين ترجمة في القاهرة .. واحد في فيصل .. والتاني في مدينة نصر .. وهي كانت قدمت فيهم بالفعل .. بس لظروف عندها ما حضرتش الاختبار وبالتالي راحت عليها .. فقلت لها تبعتهم لي وفعلاً تفضلت مشكورة وبعتتهم sms وراسلتهم فعلاً من شهرين أهو ولسة برضه مافيش رد : )

قدمت مؤخرًا في شركة ART
ردوا عليا بعدها بــ10 أيام وبعتولي الامتحان وخلصته وبعته .. وبرضه مستنية الرد : )

حاولت أبحث عن دور نشر أو مكاتب ترجمة هنا في المنصورة أو حتى في مناطق قريبة منها .. للأسف اكتشفت إنه مستواها هزيل جدًا وشغلهم عك بصراحة .. خصوصًا إنه كان ليا تجارب قبل كدة في الترجمة أيام الجامعة وكان المترجمين دون المستوى خالص .. غير إنها مش مجدية ماديًا للأسف .. غير كمان إنه مافيش طلب على مترجمين عندنا في المنصورة .. واضح إنهم مستكفيين باللي معاهم :D

وأديني أهو قاعدة في البيت لا شغلة ولا مشغلة
ضارباها طناش من كله
حياتي كلها أفلام وكتب وسفر بخيالي لبعيد أوي
ونووووووووووووووووووووم :D



وما زالت رحلة البحث عن شغـــل مستمرة
ولا يزال الأمـــــــــل قائمــًا