فوقــوا ..

أول جريمة في الكون كانت بين اتنين إخوات
قابيل .. هابيل .. يا ريتنـا بنتعلم من كل اللي فات

تاريخنا عاد نفسه مليون مرة وما بنتعلمش
و بنسأل نفسنا دايمـًا طب ليه ما بنتقدمش

قالها راجل حكيم زمــان
في الاتحاد قوة وفي الفرقة ضعف
يا ريتك تفهم معنى كلمة ضعف

عارف الغرب اتحول عالم أول ليــه؟
مشيوا بالظبط ع اللي في يوم جدودك قالوا عليه

الغرب اتعلم مننا فكرة الاتحــاد
و ترجم كل كتبنا للغتهم واتقدم واستفاد

و احنا بقينا عالم تالت
و كُرْهنا لبعض زودهــا
خلانا عالم .. مكانه ثابت

يا مصــر .. و يا جزائر .. انتوا أحفــاد شهداء
لرفع اسم العروبة فوق فدوها بالدمــاء
و الله لو عملتم نص اللي اتعمل ما بينكم
ساعة ما أمريكا جت غزت العراق
مكانتش دخلت

خير أجناد الأرض
وأقوى وأعظم ثوار
لو اتحدتوا مع بعض
صوتكم حيكون جبار

قريت جرايد بره .. شوفت اليوتيوب .. واتنكدت
يااااااااااه .. لما الحفيد يضيع جهد الجــد

صراع الإخوات بقى مانشيتات جرايد الغرب
كل المحطوط على اليوتيوب مش تشجيع دي اسمها حرب

تشجيع بلدك من حقك
مش بس من حقك ده واجبك
اهتف قوم ارفع علمك
شيل كُرْه أخوك من قلبك

و اوعى تخلى الأنانية والعصبية تشوه وطنك
الوطن العربي .. ما هو وطني ووطنك
فيكوا نفس الأديان
فيكوا نفس الألوان
نفس القارّة
نفس الوطن
انتوا الاتنين إخوان

فوقوا
فوقوا
فوقوا



رسالة إلى كل فنان أو إعلامي
سواء في مصر أو الجزائر
ساهم في زيادة المشكلة بين الشعبين
عشان يزود شعبيتـه

أنا لا أحترمك